Niklas Paradis, ki je bil v Ljubljani zaprt zaradi umora, po cesarjevi milosti pa izpuščen, obljublja sodniku in svetu v Ljubljani, da bo v 14 dneh odšel na Hrvatsko in da se ne bo maščeval.

Orig. perg. v MALj. /SI ZAL LJU 333-32/
Obj.: Komatar v Jahresbericht ljublj. realke 1903/4, str. 27, št. 28.

Ich Niklas Paradis bekenn offentlich mit dem brief vnd tu kund allen den die in sehen, horen oder lesen. Als mich die erberen weisen der richter, rat vnd burger gemainklich der stat Laibach in venkgnuos genomen, darinn ain zeit gehalten sachenhalben das mord weylent Lienharten Burggr ainen burger ze Laibach berürend vnd nuo aus merklichen vrsachen den allerdurchleuchtigisten fürsten vnd herrn hern Fridreichen römischen kayser zu allen czeiten merer des reichs, ze Hungern, »Dalmacien, Croacien etc. kunig, herczog ze Osterreich vnd ze Steyr etc. meinem allergnedigisten herrn dar zu bewegunden, ich nach verlassen seiner kaiserlichen gnaden aus solher venkgnus gelassen vnd der ledig gesagt bin, das ich bey meinem ayd gelob vnd versprich wissentlich mit dem brief, das ich inner vierczehen tagen nachst nach datum des briefs komenden mich aus dem fürstentumb Krain auch der wanschafft windischer lannd vnd dem krabatischen fuegen vnd darinn nymermer an sunder gnad vnd erlaubnuoss des benanten meins allergnedigisten hern des römischen kaisers komen will noch soll. Ich gelob auch bey meinem ayd als vor stet fuer mich vnd all mein erben, frewnndt, helffer vnd gunner vnd all die mir gewant sein, das wir von der oberürten venkgnuos wegen vnd was sich da zwischen vncz auf hewtigen tag mit meinem leib oder guet vergangen hat nichts ausgenomen dem benanten vnserm allergnedigisten hern dem romischen kaiser seiner gnaden erben vnd lannden vnd lewten vnd allen den yren vnd sunder den bemelten von Laybach auch allen andern, die in der sachen verdacht oder gewant sein, hinfuer ewiklich kchaynerlay veintschafft noch rach mit recht noch an recht, geistlich oder weltlich durch vns oder ander von vnsern wegen ze suhen vnd in vngueten darvmb mit inn nichts ze handlen auch die sachen nicht ze efern sullen noch wellen in dhainerlay weis angeuerde. Vnd ob ich oder ander von meinen wegen wider das alles so eben begriffen ist oder ir ains icht tetten oder hienndlen das wissentlich wurd, das alsdann ich allenthalben als ain übersagter vnd überwuntner auch vngerechter gestrafft vnd dafuer gehalten werden soll. Wuerden auch ander von meinen wegen dawider ichts handlen, die sullen auch darinn allenthalben vngerecht sein treulich vnd vngeuerdlich. Vnd des zu vrkund gib ich disen brief versigelten mit der edln vnd vesten Erasem des Stayners vnd Achaczen des Peysers baider anhangunden insigeln, die sy durch meins obgenanten Niklasen Paradis fleyssigen gebet willen an den brief gehangen haben in vnd yren erben an schaden darvnder ich mich fur mich vnd all main erben, frewnndt, helffer vnd gunner vnd all die mir gewant sein verbinde alles das war vnd stet ze halten das oben an dem brief geschriben stet. Der geben ist an sannd Philipp vnd Jacobs der heyling zwelffbotten tag, nach Cristi gebürd vierczehenhundert vnd darnach in dem aindvndsechczigisten jare.

/Od dveh obešenih pečatov ostal le perg. trak prvega./

GZL III/67

Po originalu B. Otorepec