Cesar Friderik III. naroča sodniku in svetu v Ljubljani naj podele ustanovo zgodnje maše v cerkvi sv. Nikolaja duhovniku Mohorju iz Lanišča kot jih je prosil ljubljanski škof Sigmund.

Prepis v nedatiranem vidimusu iz ok. 1500 v MALj. /SI ZAL LJU 333-57/

Fridreich vonn gots gennaden romischer khaiser zw allen zeiten merer des reichs zu Hungern, Dalmacien etc. khunig herzog zw Osterreich zu Steier. Erbern weisen getrewen lieben. Der erwirdig Sigmundt bischoue zw Laibach vnnser rat vnnd lieber andachtiger hat vnns yez zu erkhennen geben wie er alss eur bischoue sein erste bet vmb ain gotsgab eur lehennschafft vnnd nemblich fur di fruemes in sanndt Niclas khirchen daselbs ze Laibach fur den erbern vnnsern lieben anndechtigen herr Machern vonn Harlannd korherrn daselbs gethan vnd gebeten hab im dieselb fruemess, so die ledig wirdet zu uerleichen. Begern wir an ew mit gannzem vleiss vnd ernnst, das ir demselben herr Machern die pemelt fruemess, so die ledig wirdet auff solh des obgenanndten bischoff zw Laibach ersste bete fur annder leihet vnnd damitt fursehett vnnd nachmals dem erwern vnnserm lieben andachtigen Jacoben Cupy dafur dann als wir vernemen durch pet an ew beschehen sein ain annder gotsgab eur lehennschafft so die ledig vnnd ir darumb von im angelangt werdet leihet, wann der benannt von Laibach sich willig erpewtet ob in ee dann ew ain gotsgab seiner lehennschafft ledig wirdet im desgleichs damit furzesehen vnnd ew darinn guetwilligt vnnd also beweiset damit der penannt herr Machern diser vnnser auch des obbenannten bischoue von Laibach bete emphind austreglich genossen zehaben. Daran thuet ir vnns sunder guet geuallen vnnd vnser mainung. Wir wellen das auch gen ew gunstigkhlich mit gnaden erkhennen. Geben zw der Newnstat an freitag nach den heilligen weichnacht feiertagen, anno domini etc. LXIIII^o, vnnsers khaiserthumbs im zwelfften jare. Comissio domini imperatoris propria. Den erbern vnnsern getrewen lieben n.dem richter vnnd ratt zw Laibach.

GZL III/75

Po prepisu B. Otorepec