Cesar Friderik III. prepoveduje na pritožbo mest Ljubljane, Kranja, Kamnika, Višnje gore in drugih mest na Kranjskem obrt in trgovino na podeželju.

Orig. perg. v MALj. /SI ZAL LJU 333-45/
Obj.: Komatar v Jahresbericht ljublj. realke za 1903/4, str. 32-33, št. 39.

Wir Friderich von gotts gnaden römischer kayser zu allenn tzeitten merer des reichs zu Hungern Dalmacien Croacien etc. kunig hertzog zu Osterreich zu Steyr zu Kernndten vnd zu Krain etc. Embieten den edlen vnnsern lieben getrewen n.allen vnnsern haubtlewten grauen freyen herren rittern vnd knechten verwesern vitzthumben pflegern burggrauen burgermaistern richtern reten burgern gemainden vnd besonnder vnserm lieben getrewen Wilhalmen von Awrsperg vnserm rate camrer vnd haubtman in Krain oder wer kunffticlich vnser haubtman verweser oder vitztumb daselbs in Krain sein den der brief getzaigt wirdet vnnser gnad vnd alles gut. Als vnnser burger zu Laybach, Krainburg, Stain, Weychsselberg auch in anndern vnsern stetten vnd merkhten in vnnserm furstentumb Crain von vnsern voruordern fursten von Osterreich löblicher gedechtnuss mit freyhaiten vnd gnaden furgesehen sein daz khain pawr noch annder auf dem lannde dhainerlay hanntwerch gewerb noch hanndel mit kauffmanschafft waar lederwerch leinbat eysen viech vnd in annder wege treiben vben noch vngewonndlich tafern vnd schennkhewser, die von altterheer nicht gewesen sein auf dem lannde im demselben vnserm furstentumb Krain, gehalten noch frombd strassen mit solhem hanndl waar vnd kauffmanschafft geubt werden sullen dieselben freyhait wir in auch bestett haben. Dawider aber die bemelten vnser stett vnd merkht mit den vngewondlichen henndl vnd gewerb die auf dem lannde mit hanndtwerch lederwerch leinbat eysen viech vnd allerlay anderr waar vnd kauffmanschafft von menigerm getriben auch mit weinschennkhen in den berurten vngewondlichen tafern schennkhewsern vnd frombden strassen merkhlich beswert werden vnd dadurch in abnemen komen auch wir desshalben an vnsern mewtten vnd camergutt, nachdem solh waar vnd kaufmanschafft an dieselben vnser mewtt vnd aufsleg nicht bracht wirdet, abganng haben das vns nicht geuelltt, empfelhen wir ew allen vnd ewr yedem besonnder ernstlich vnd wellen daz ir auf anlanngen der obbemelten vnnser stett vnd merkht die bemellten vngewondlichen henndel gewerb hanntwerch weinschennkhen tafern schennkhhewser vnd frombd strassen auf dem lannd in demselben vnserm furstentumb Krain, so von altterheer nicht gewesen sein, von vnsern wegen weret vnd verpietet vnd darob seit damit die berurten vnnser stett vnd merkht wider die bemelten ir freyhait vnd gnad nicht gedrungen sonnder dapey gehalten vnd solh gewerb vnd henndel vnd hanndtwerch in denselben vnsern stetten vnd merkhten als von altterherkomen ist gebraucht vnd geubt werden. Welhe aber daruber mit kauffmanschafft waar lederwerch leinbatt eysen viech oder in annder wege vngewöndlich henndel vnd gewerb oder hanndtwerch treiben auch wein in den vngewonndlichen tafern vnd schennkhewsern auf dem lannd auschennkhen oder frombd strassen vben wurden denselben solh kaufmanschafft waar vnd lederwerch leinbat eysen viech auch wein, wo ir die ankomet, zu vnsern hannden nemet dadurch die vngewonndlichen henndel gewerb hanndtwerch vnd weinschennkhen in demselben vnserm furstentumb Krain geweret vnd vns vnnser mewtt vnd camergut auch nicht verfurt werden vnd darinn nicht annders tut als lieb ew allen vnd ewr yedem sey vnnser swere vngnad vnd straff zu uermeiden. Das ist vnser ernnstlich maynung. Geben zu Ynsprugk an freytag vor dem suntag oculi in der vassten anno domini etc. LXXXVIIIo vnnsers kaiserthumbs im sechsunddreissigisten vnnserr reiche des römischen im achtunduiertzigisten vnd des hungrischen im dreyssigisten jarenn.
Commissio domini
imperatoris propria

/Pečat na hrbtu listine odkrušen./

GZL IV/19

Po originalu B. Otorepec

Opomba:
Listina objavljena v Božo Otorepec, Dragan Matić, Izbrane listine Zgodovinskega arhiva Ljubljana (1320-1782), Transkripcije z regesti in komentarji, Ljubljana 1998, str. 63-64.

© 2016 Zgodovinski arhiv Ljubljana. Vse pravice pridržane.

Prilagoditev pisave