Cesar Friderik III. znova naroča Viljemu Turjaškemu, deželnemu glavarju na Kranjskem, da odpravi trgovino plemstva z živino, vinom in drugim.

Orig. papir v Drž. arhivu Slovenije v Ljubljani; prepis iz 16. stol. v privil. knjigi
Ljubljane v MALj, fol. 22′-23, št. 43.
Obj.: Klun, Dipl. Carn., str. 49, št. 72.

Wir Friderich von gottes gnaden römischer kaiser zu allenn zeiten merer des reichs zu Hungern Dalmatien Croatien etc. kunig herzog zu Osterreich zu Steir. Embieten vnserm lieben getrewn Wilhalmen von Awrsperg vnserm rate camrer vnd haubtman in Krain vnnser gnad vnd alles gut. Wir haben dir vormals geschriben vnd beuolhen den khauf des viechs wein vnd annders so die vom adl besonnder vnnser phleger lanndtrichter vnd ambtlewt daselbs in Krain ettlich jar her bey in zu irm nuz gehallten haben vnsern purgern daselbs in Krain widerrumb zu uerhelffen den wie vor ettlichen jarn gewesen ist aufzerichten nach lautt vnnserr brief darumb ausganngen das aber bey dir nicht verfanngen hat dadurch vnnser stett in Krain merklichen mangl haben vnd in abnemen komen das vnns nicht geuellt. Nu eruordert vnnser notturfft vnns geburtt auch dieselben vnnser stett widerumb zu irn hanndlungen ze bringen, demnach emphelhen wir dir ernstlich vnd wellen daz du von vnsern wegen darob seist vnd bestellest daz die bemelten vom adl phleger lanndtrichter vnd ambtlewt den wir hiemit auch schreiben furan kainerlay viech wein traid noch annder teglich narung mer verkhauffen sonnder dieselben khewff zu den bemelten vnsern stetten komen oder dieselben vnnser burger die allennthalben in vnsern vnd irn herschefften gebieten vnd verwesungen zu der bemelten vnserr stett notturfften bringen lassen solchs auch mit vnesern vnd irn lewten ze tun bestellen vnd in das nicht mer verbieten. Welh aber das daruber vberfarn solh verkhauffen weitter tun vnd vnnser burger darinne verhindern wurden den solhs werest in ir viech vnd annders so sy verkhauffen zu vnsern hannden nemest vnd darinne nicht sawmig seist noch annders tust damit die sachen nicht mer an vnns gelanngen noch deshalb weitter hanndlung not werde. Daran tust du gennzlich vnnser ernstliche maynung. Geben zu Lynnz an sambstag nach dem heiligen auffarttag anno domini etc. LXXXXI vnsers kaisertumbs im vierzigisten jare.

Comissio domini
imperatoris propria

/Pečat izstavitelja na hrbtu listine odkrušen./

GZL IV/22

Po originalu B. Otorepec