Kralj Maksimilijan I. odreja obvezno skladiščenje v Ljubljani za šest tednov in način prodaje blaga.

Orig. papir v MALj; privil. knjiga Ljubljane v MALj, fol. 27-28, št. 48.
Obj.: Klun, Dipl. Carn., str. 54, št. 82.
Reg.: Komatar v Jahresbericht ljublj. realke za 1903/4, str. 37, št. 47.

Wir Maximilian von gots genaden romischer kunig zu allenn tzeitten merer des reichs zu Hungern Dalmacien Croacien etc. kunig erzherzog zu Osterreich herzog zu Burgundi zu Brabannt vnd phalzgraue etc. Embietten allen vnd yeglichen in waz wirden stattes oder wesens die sein den diser vnnser brief gezaigt oder verkundt wirdet vnnser gnad vnd alles gut. Als die erbern weisen vnnser getrewen lieben n.die richter rete vnd vnnser burger gemainklichen in vnnsern stetten vnd merckhten in vnnsern furstenthumben vnd lannden Steyr Kerndten vnd Crain gegen den ausslendischen kauflewten als Hungern vnd Walhen mit den kaufmanshenndeln vnd gewerben so dieselben kaufleut in die beruerten vnnser lannde zu uerkauffen vnd widerumb daraus furn vnd vertreyben auch der niderlag halben allerlay beswerung menngel vnd geprechen gehabt vnd dadurch an irer narung in gross abnemen armut vnd verderben komen vnd vnns an vnnserm camerguet appruch erwachsen sein, darein vnns als regierenden herren vnd lanndsfursten zu sehen vnd darinnen wenndung ze tun gepuret, daz wir darauf ain ordnung wie es deshalben hinfur gehalten werden sulle bis auf vnnser wolgefallen aufgericht vnd gemacht haben, nemblichen also wann ain Walh oder Hunger oder ain annder auslennder, der mit aigem rugkhen hinder vnns nit angesessen ist, mit seinen kaufmansguttern von Welhischen lannden gen Laybach kombt, so sol er solh sein kaufmansgut daselbst niderlegen vnd innerhalb sechs wochen den nechsten, als er solh sein gut dahin pracht hat, keinem gasst vekauffen sonnder allein vnnsern burgern die in den obbestimbten vnnsern erblannden gesessen, es sein Teutsch oder Walhen, denselben mugen sy solh ir gut, waz des auf die waag gehort zentenweiss bey lagln vnd samen vnd annder ir guet stugkweise vngeirrt wol verkauffen. So aber die gemelten vnnser burger in den beruerten sechs wochen nicht von in kauffen wolten, so mugen die vorgenannten gesst solh ir guet zu ausganng derselben sechs wochen ainem gasst daselbst zu Laybach verkauffen oder aber damit alsdann ferrer in den bestimbten vnnsern erblannden auf die freyen jarmerckht ziehen vnd das anwerden wie dann derselben ennde gewonhait vnd von alter herkomen ist. Item es sol auch der gasst mit guldein stugken vnd samat hierinnen vnuerpundten sein sonnder albeg macht haben die durch Laybach auf das Hungrisch oder auf die freyen jarmerckht in denselben vnnsern erblannden vnaufgehalten zu furn vnd daselbst zu uerkauffen. Item es sol auch der gasst daselbst zu Laybach macht haben in den dreyen jarmerckhten zu Laybach sein tuech, so er dahin pringet, ellnweise auszuschneiden oder stugkweise, auch annder sein waar gessten oder inwonern wol verkauffen mugen wie von alter herkomen ist. So aber ain Hunger oder Walh oder ain yeder annderer auslenndischer burger mit ochssenhewten oder mit anndern kaufmansguttern von Hungern gen Pettaw kumbt daselbst sol er solh hewt vnd waar fur Pettaw nit furn sonnder da niderlegen vnd der freyen jarmerckht daselbst erwarten vnd in denselben jarmerckhten gessten oder vnnsern burgern nach seinem gefallen verkauffen, wo in aber solh jarmerckht zu erwarten nicht fugen wolten, so mag derselb gasst solh waar vnd kaufmansgutter ausserhalb vnd vor den beruerten jarmerckhten ainem yeden vnnserm burger er sey Tewtsch oder Wolhisch all tag wol verkauffen. Item die bestimbten zwo niderleg zu Laybach vnd zu Pettaw sullen auch vnnserr burger in den obberuerten vnnsern erblannden gesessen in nichte pindten, sonnder dieselben vnnser burger sullen vnd mugen durch solh niderlag vnd anndern ennden hanndeln vnd wandeln wie von alter herkomen ist. Vnd gebietten ew demnach allen vnd ewr yedem in sonderhait ernnstlichen vnd wollen, daz ir solh ordnung von vnnsern wegen vesstigklichen hanndthabet vnd halltet vnd nicht gestattet das durch yemands dawider ichts furgenomen noch gehanndelt sonnder derselben mit irer innhalt wie oben angezaigt ist gehorsamlich gelebt vnd nachkomen werde vnd euch hierinnen nicht annders erzaiget. Daran tut ir vnnser ernnstliche mainung. Geben an montag vor vnnser lieben frawen tag assumptionis anno domini funffzehenhundert vnd im dritten vnnserer reiche des romischen im achtzehenden vnd des hungerischen im vierzehennden jarn.
Comissio domini
regis in consilio

/Pečat izstavitelja, pritisnjen na hrbtu listine delno okrušen./

GZL IV/39

Po originalu B. Otorepec

Opomba:
Listina objavljena v Božo Otorepec, Dragan Matić, Izbrane listine Zgodovinskega arhiva Ljubljana (1320-1782), Transkripcije z regesti in komentarji, Ljubljana 1998, str. 81-84.