Cesar Maksimilijan I. naroča plemstvu in duhovščini naj plačujejo od svojih hiš, ki so jih kupili v mestu Ljubljani davke in opravljajo druge služnosti.

Orig. papir v Drž. arhivu Slovenije v Ljubljani; prepis iz 16. stol. v privil. knjigi Ljubljane v MALj, fol. 8′-9, št. 14.
Obj.: Klun, Dipl. Carn., str. 56, št. 85.

Wir Maximilian erwellter von gottes gnaden römischer kayser zu allenn tzeitten merer des reichs in Germanien zu Hungern Dalmacien Croatien etc. kunig ertzhertzog zu Osterreich hertzog zu Burgunndi zu Brabannt vnnd vnnd /!/ phalnntzgraue etc. Embieten allen vnd yegklichen den vom adel briesterschafft burgern vnd andern so diser vnnser brief getzaigt oder zu wissen gethonn wirdet vnnser genad vnnd alles gut. Vnns haben vnnser getrewen lieben burgermaister richter rate vnnd vnnser burger gemeingklich zu Laybach anbringen lassen wie sich etlich aus euch ain zeit her vnnderstanden hewser an sich zu bringen vnnd zu kauffen, dauon ir aber kein mitleiden mit gemellter stat Laybach zu tragen vermeinet daz in vnnd bemellter stat Laibach an stewrn robat wacht vnnd in annder weeg zu mercklichem abbruch vnnd nachteil raichet vnnd vnns vmb genedige wenndung hierynn diemutigklichen angeruffen vnnd gebeten. Vnnd so vnns nu solh obangezaigt ewr furnemen vnnd hanndlung, dieweil die wider alts herkumen vnnd vnnser oberkeit nachtailig sein, zu gestatten keins weegs gemaint sein will, emphelhen wir demnach euch allenn vnnd ewr yedem in sonnderhait mit ernnst gebietennde vnnd wellen, daz ir von ewrn heusern was ir derselben in kaufweis oder sonnst an euch bracht oder hinfur bringen werden vnnd von alterhere nicht gefreyt gewesen sein mit obbemelter vnnser stat Laybach in allen sachen vnnd anslegen wie sich geburt vnnd von allter herkumen ist, mitleidet traget vnnd euch darynn gehorsamlich vnd dermassen haltet vnnd beweiset damit vnns nit geburn werde in annder ernnstliche weeg wider euch zu hanndlen. Daran tut ir zusambt der billicheit vnnser ernnstliche maynung. Geben zu Augspurg am ainundzweintzigisten tag des monods martii anno domini funfftzehenhundert vnnd im zehennden vnnser reiche des romischen im funffundzweintzigisten vnnd des hunngerischen im zweintzigisten jarenn.

Comissio domini
imperatoris in consilio

/Pečat izstavitelja na hrbtu listine odkrušen./

GZL IV/48

Po originalu B. Otorepec