Cesar Maksimilijan I. naroča vsem stanovom in podložnikom na Kranjskem, da prepoveduje trgovino, obrt in prekupčevanje na podeželju pri samostanih, gosposkah, gradovih in vaseh, ker zaradi tega propadajo mesta in trgi.

Orig. papir v MALj; prepis iz 16. stol. v privil. knjigi Ljubljane v MALj, fol. 24′-25′, št. 46.
Obj.: Klun, Dipl. Carn., str. 56-57, št. 86.

Wir Maximilian erwelter von gots gnaden romischer kaiser zu allenn tzeitten merer des reichs in Germanien zu Hunngern Dalmatien Croatien etc. kunig ertzhertzog zu Osterreich hertzog zu Burgundi zu Brabannt vnd phaltzgraf etc. Embieten den ersamen geistlichen andechtigen edeln vnnsern lieben getrewen n.allen vnnsern prelaten den von adel steten merkhten vnd den auf dem lannde vnd sonnderlich vnnsern verwesern vitzthumben phlegern lanndtrichtern mauttnern zollnern aufslegern vnd sonnst allen anndern vnnsern ambtlewten vnderthanen vnd getrewen vnnsers furstenthumbs Crain den diser vnnser brief getzaigt oder verkundet wirdet vnnser gnad vnd alles gut. Wir werden bericht wiewol vnnser stete vnd merckht gedachts vnnsers furstenthumbs von weilent vnnsern vorfordern fursten von Osterreich etc. loblicher gedechtnuss vnd vnns preuilegirt vnd gefreyt, das nyemands als vnnser burger derselben stete vnd merckht so gesworen sein, hanndtirung vnd gewerb mit kauffen vnd verkauffen treiben sollen, so sullen sich doch etwouil aus ew wider solh vnnser burger preuilegia vnd freyhait vnndersteen bey iren clostern herrschafften slossen dorffern flegkhen vnd gebieten dergleichen hanndtirung kaufmanschafft vnd gewerb zu vben, solhs auch iren vnnderthanen vnd sonnderlich den furkauff zu gebrauchen gestatten, deshalben dann die bemelten vnnser stete vnd merckht, nachdem aus oberurter hanndlung der kaufslag von in kumen vnd derselb desgleichen der furkauf auf dem lannde vberhannde genomen, bisher dermassen in verodung abnemen vnd verderben bracht worden, dardurch sy vnns yetzo mit iren diennstperkaiten so sy vnns als irem herrn vnd lanndtsfursten zu thun sein nicht so statlich als vormalen beschehen ist vnd die notdurfft diser leuff eruordert erschiesslich sein mogen, vnd dieweil vnns nu solh furnemen vnd hanndlung nachdem die nicht allain den obenannten vnnsern burgern sonnder auch vnns vnnsern erben vnd nachkomen kunfftigclichen an vnnserm camergut zu nachtail raichen zu gedulden khains wegs gemaint ist, emphelhen demnach ew allen vnd ewr yedem in sonnderhait ernnstlich gebietend vnd wellen daz ir ew bey ewren clostern herrschafften slossen dorffern flegkhen gebieten vnd verwesungen nu furan khainerlay hanndtirung oder gewerb mer gebrauchen, des auch ewren lewten vnd vnnderthanen nicht mer gestattet, sonnder solh hanndtirung vnd gewerb die obemelten vnnser gesworen burger in stetten vnd merckhten innhalt irer freyhait vnd wie von allter herkomen oder brieflich vrkundt darumb treiben vnd vben lasset, auch allennthalben in denselben ewren herrschafften slossen dorffern flegken vnd gebieten vnd verwesungen den furkauf zu treiben genntzlichen verbietet vnd ernnstlich darob seyt damit sich desselben furan nyemands mer gebrauche, ausgenomen die metzger den geben wir zu das sy viech auf dem gew allain zu notdurfft irer slachpennckh vnd nicht furter zu uertreiben kauffen mugen, das wellet also bey ew in ewren verwesungen offenlich verkunden vnd beruffen lassen sich menigclich darnach wissen zu richten. Welh ir aber ausserhalb vnnser gesworen burger die nicht von irer oberkeit steten vnd merckhten burgerbrief furbringen mit ainicherlay kaufslag oder furkauf auf wasser oder lannde ankoment vnd erfaret denselben solh gut zu vnsern hannden nemet vnd in arrest leget vnd so das beschehen ist alsdann des vnnserer regiment vnnserer Niderosterreichischen lannde berichtet auch sonnst hirinn alles das hanndlet vnd furnemet so vnns an vnnserm camergut vnd vorbemelten vnsern steten vnd merckhten zu aufnemen vnd gutem komet vnd nicht sewmig erscheinet. Daran tut ir vnnser ernnstlich maynung. Geben zu Augspurg am vierden tag des monats aprilis nach Cristi geburd funffzehenhundert vnd im zehennden vnnserer reiche des romischen im funfundtzwaintzigisten vnd des hunngerischen im zwaintzigisten jaren.

Per regem pro se. Comissio domini
imperatoris propria

/Pečat izstavitelja na hrbtu listine ohranjen./

GZL IV/49

Po originalu B. Otorepec

Prilagoditev pisave