Cesar Maksimilijan I. potrjuje odredbo o skladišču v Ljubljani in odreja, da ne smejo tuji trgovci mimo Ljubljane hoditi po kožuhovino na Hrvatsko, temveč jo kupujejo v Ljubljani, kot je to v stari navadi.

Vidimus v listini 1535, junij 19. Ljubljana v MALj, prepis iz 16. stol. v privil. knjigi Ljubljane, v MALj, fol. 28-29, št. 49.
Obj.: Klun, Dipl. Carn., str. 58-59, št. 89.

Wir Maximilian vonn gottes gennaden erwellter romischer kayser zw allen zeytten merer des reychs in Germanien auch zw Hugern Dolmacien Croacien etc. kunig ertzhertzog zw Osterreych hertzog zw Burgunndy zw Brabannt vnnd pfallentzgraue etc. Empetten allen vnnd yegcklichen in was wirden stannds oder wesenns die sein denn diser vnnser brieff furkhumbt oder verkhundt wirdet vnnser gnad vnnd alles guets. Als die erbern weysen vnnser besonder lieben vnnd getrewen n.die burgernmayster richter ratt vnnd burger vnnser stett vnnd merchkt in vnnserm furstennthumben vnnd lannden Steyr Kernndten vnnd Crain gegen den auslenndigen kauffleutten als Hunngern vnnd Walhen mit den kauffmanshendeln vnnd gwerben so dieselben kauffleutt ein vnnd aus denselben vnnsern lannden treyben, auch der niderleg halben allerlay beswarung menngel vnnd geprechen gehabt vnnd dardurch ann irer narung zw grossem abnemen armuett vnnd verderben gewachsen sambt den scheden vnnd nachtayll so auch vnns ann vnnserm camerguett daraus entstannden sein, derhalben wir verschiner jar ein ordnung solicher kauffmannshenndel gewerb vnnd niderlag halben auffgerihct vnd dieselb durch vnnser offen brieff ausgeschriben haben am datum lautendt monntags vor vnnser lieben frawen tag assaumpcionis /!/ anno domini etc. im dritten. Dieweyll vnns aber anlangt wie den obgedachten vnnsern stetten vnnd merkten in solicher vnnser ordnung etlicher massen irrung vnnd verhinderung gescheche vnnd aber noch vnnser maynung ist dieselb gestracks also zw hallten vnnd zu uolziechen, so wellen wir solich vnser vor aufgericht ordnung wie die in vnnsern offen brieffen begriffen vnnd ausganngen ist hiemit vernewtt confirmiertt vnnd bestatt haben. Vnnd emphelhen dannach euch allen vnnd yedem in sonnderchayt mit ernnst gebietund vnnd wellen das ir die gedacht vnnser vor auffgericht vnnd aufgeschriben ordnung so ir derselben durch vnnser stett vnnd merkht oder yemanndt von iren wegen erinnerrt werdet statt vesst vnnd vntzerprochen haltet volziehett, euch derselben in alweg benuegen lassett vnnd kains wegs dawider thuett noch darin vnngehorsam erscheinett vnnd als wir sonnderlich bericht sein wie dy auslenndigen kauffleutt nach raucher waar gefill vnnd dergleychen gattung in Crawatten ziechen vnnd vnnser statt Laybach da söliche waar vnnd gattung von allter genomen worden sey verlassen, das nitt allain vnnser statt Laybach nachtayllig vnnd verderblich sonnder auch vnnserm camerguett abpruchig vnnd wider alt herkomen vnnd vnns furtter zw gedulden nitt gemaintt ist vnnd gebietten demnach allen vnnd yecklichen auslenndigen kauffleutten mit ernnst vnnd wellen das ir nun furan dy fartt vmb rauche waar gefyll vnnd dergleychen gattung inn Krawatten meydett vnnd vnnderlassett vnnd dieselben in vnnser statt Laybach wie vonn allter herkomen ist, da euch dy in guettem kauff volgen sollen, nemett vnnd hierynnen vnns auch vnnser statt Laybach zw abpruch vnnd nachtayll nitt vnngehorsam erscheinett bey vermaydung vnnser sweren vngnad vnnd straff. Das maynen wir ernnstlich. Geben in vnnser statt Audenarde in Flanndern am vierdten tag des monts augusty anno etc im dreyzehenden vnnser reyche des romischen im achtvnndzwaintzigisten vnnd des hungerischen im viervnndzwaintzigisten jaren. Per regem perse. Comissio cesare mayestatis propria. G. Vogt.

GZL IV/58

Po vidimusu B. Otorepec