Cesar Maksimilijan I. naroča deželnemu glavarju in vicedomu na Kranjskem naj se ne vmešavata v mestno sodstvo.

Prepis iz 16. stol. v privil. knjigi Ljubljane v MALj, fol. 17-17′, št. 32.
Obj.: Klun, Dipl. Carn., str. 57-58, št. 87.

Maximilian von gottes gnaden erwölter romischer kaiser etc. Edler lieben getrewen. Sich haben vnnser getrewen lieben burgermaister richter vnnd rath vnser stat Laybach vor vnser beswart wiewol sie nach iren rechten vnnd stattuten zu abstellen vil vbls vnd leichtfertigkait vnnd zu furderung gemaines nuz ye zu zeitten gegen iren burgern mit straff es sey an leib leben oder gut nach ains yeden verschulden furnemen, so begeb sich doch offt das sich dieselben schuldigten vnd tätter /:als ob inen vnrechts widerfuer:/ vor eur beklagen, darauf dann den genannten von Laybach etwo beuelch von euch beschehen, dardurch sie an volzug der straffen nach iren rechten vnnd statuten geirrt werden, daraus volgt das kainer der gleichwoll verschult vnnd verhanndelt hat zu straf komen, sonder ain yeder mag fur euch klagen vnd in der straf erledigung oder aufs wenigist irrung erlangen, das sich nit geburt auch an anndern orten nit gewonhait ist, dieweill dann ye burgermaister richter vnd rath zu Laybach derselben vnnser stat vnd der gemain als die obrigkait in vnnserm namen furgesezt vnd woluersehenlich der beschaidenhait sein das sie niemand in strafmassigen sachen vnpillich beswaren, so emphelen wir euch mit ernst vnd wöllen das ir hinfur dieselben burgermaister richter vnnd rat in vbln leichtfertigen vnd strafmassigen sachen nach irn rechten vnd statuten gestrakhs vnnd ruewigclich handlen lasset vnnd inen darin auf der tätter vnd schuldigen klagen kain irrung noch eintrag thut. Das ist vnnser ernstliche mainung. Geben in vnnser stat Audenarde am vierten tag augusti anno etc im dreyzehenden vnnsers reichs im achtvnndzwainzigisten jaren. Dem edlen vnd vnsern lieben getrewen Hansen von Auersperg herrn zu Schönberg vnnserm lanndtshaubtman in Crain vnnd Jorgen von Eggk vnnserm vizdomb daselbs vnnsern reten samentlich vnnd sonderlich.

GZL IV/61

Po privilegijski knjigi B. Otorepec