Luka Scheffman in Tomaž Essigk cehovska mojstra Marijine bratovščine čolnarjev izdajata potrdilo o ustanovi Apolonije Glanhofer v Križankah.

Orig. perg. v MALj.

Ich Lucas Scheffman vnd ich Thomas Essigk zechlewt vnser liebn frawen bruedersch /!/ der schefflewt im thewtschen hauss zu Laibach bekennen fur vns vnser nachkumen vnd brueder wissentlich vnd in crafft des brieffs, als die ersam vnd tugenthafftige fraw Appolonia weillundt Hannsen Glanhoffer burger zu Laibach verlassne wittib nach abgangk desselbign ires hawswirts saligen das geschefft so derselbig ir gemahell bey guetter vernunfft in seinem lesten willen gott dem almechtigen der lobsamen jungfrawen Marie vnd allen heiligen gottes zu seiner auch seiner voruodern nachkumen vnd allen glaubigen seelln zu hilff vnd trost ettlich gärttn vor der stat Laibach im Burgstall gelegn in bemelt vnser bruederschafft der schefflewt im thewtschen hawss verordent vnd gestifft, volstrekung desselbigen ires hauswirts Hansen Glanhoffers seligen geschefft vnd stifft gethan, hat bemelte fraw Appolonia als ein trewe wittib ires hawswirts nach dem durch weillundt kayser Fridrichen hochloblicher gedechtnuss in allen irer maiestat erblanden geschefft vnd mandaten ausgangen sein das kein ligundt guet auff kirchen vnd gotzhewser verstifft verschaffen oder in ander weg gegeben vnd verordent werden sullen, irn liebn sun Lienhartten Glanhoffer auch saligen zu yetz kayserlichen maiestat geschigkt vnd durch denselbigen allen muglichen vleiss ankhert damit solh gschafft ordnung vnd lester willen irs hauswirts seligen wurde auffgericht, darinnen sich ir kaiserliche maiestat als allergenedigister herr gnedigklichen gehalten derselbigen frawn Appolonia vnd irn kindern erlaubt vergondt vnd zuegebn solhem geschefft voltziehung zu thuen, inhalt irer kayslerlichen maiestat beuelh vnd geschefft des datum Pettaw am sechszehendten septembris anno funfftzehenhundert vnd im sechsten jar, auff solch zuegebn buruerter kayserlichen maiestat hat bestimbte fraw Appolonia vns vorberuertten zechlewtten vnd bruedern vnser liebn frawn bruederschafft der schefflewt im thewtschen hauss sybentzehen gärtn, der yeder jarlich zwenundsybentzigk schiling dint, vnuerkumert aingeantbort vnd derselbigen gärttn in nutz vnd beruebte gewer gesetzt die mit der ain seittn an der khursner bruederschafft gärttn an den akher so die fleischhagkher bruederschafft in hat vnd der freyen strassen gelegen dergestalt das durch vns zechlewt bruederschafft vnd vnser nachkumen zu einer yeden kottember bestelt vnd zu halten furgenomen vnd verordent werden soll ein gesungens seellambt mit einer offnen peicht vnd gedechtnuss des beruerttn Hansen Glanhoffers aller seiner vorfodern auch bestimbter frawen Appolonia als voltziherung solhs gescheffts irer eltern kindern nachkumen vnd aller glaubigen seelln gesprochen vnd von solhem seelambt offner beicht vnd gedenkhn wir dem briester vnd schulmaister achtzehen schulling von ainem gesungen lobambt achtzehen schilling vnd von vier mess dy vndter solhen baiden embtern gehaltn werdn sullen viertzigk schilling auch den briestern vnd schuelmaister fur di vigili vierundtzwaintzigk schilling vnd fur das placebo acht schilling fur ain halb wein drey schilling vnd dem messner zu yeder kottember zwen schilling vnd dem innemer der solh zinss von angetzaigten garttn einpringt viertzigk schilling von angetzaigter guldt, vns mitsambt dem stifftbrieff eingeantbort aussrichten vnd betzallen als wir solhs an stat vnser selbst auch der brueder vnd vnser nachkumen benanter frawen Appolonia zu thuen vnd zu einer yeder kottember zu uolbringen vnd trewlichen nach zukumen zuegesagt habn. War aber sach das wir solhem vnserm zuesagn zu allen kottembern nicht nachkumen oder noch inhalt ditz reuerss voltziehung thuen, so dan soll vnd mag offtbenante fraw Appolonia vnd nach irem abgangkh die fursichtigen erbern vnd weisen burgermaiste richter vnd rate der stat Laibach sich der angetzaigten sybentzehen garttn widerumb vnderwinden vnd vns mit ernst dartzue haltn damit durch vns vnd vnser nachkumen die gotzdinst so nicht ausgericht volbracht werdn, sy sulln auch darnoch dieselbign garttn vnd gult in ander weg stifftn damit solh stifft vnd geschefft jarlich vnd zu kottember zeittn volbracht vnd nicht vnderdrugkt werde trewlich vnd vngeuarlich. Vnd des zu warer vrkundt habn wir obgemelt zechlewt der schefflewt mit vleiss gepetten die edlln vnd vesstn Andren Harrer vnd Hannsen Scharffen das die von vnser vleissigen pett willn ire insigl an ditz gegnwurttigs reuerss gehangn habn in vnd alln iren erben on schadn, darundter wir vns fur vns vnser brueder vnd nachkumen verpinden alles war vnd stat zu halten inhalt des brieffs der geben ist den ersten nouembris anno funfftzehenhundert vnd im dreytzehendtn jare.

/Od dveh obešenih pečatov ostal le perg. trak prvega./

GZL IV/63

Po originalu B. Otorepec