Cesar Maksimilijan I. potrdi Ljubljani pravico do skladišča za trgovsko blago in do zgraditve novega poslopja zanj s pobiranjem umerjene pristojbine.

Prepis iz 16. stol. v privil. knjigi Ljubljane v MALj, fol. 43′-44, št. 70.
Obj.: Klun, Dipl. Carn., str. 60, št. 91.

Wir Maximilian von gottes gnaden erwelter romischer kaiser zu allen zeiten merer des reichs in Germanien auch zu Hungern Dalmacien Croatien etc. kunig erzherzog zu Osterreich herzog zu Burgundi zu Brabanndt vnd pfalzgraue etc. Bekennen offentlich mit disen brief vnnd thun kundt allermenigclich als wir verschiner zeit ain ordnung aufgericht die auch yezo verneurt vnnd bestat haben vnnder anderm inhalt das zu Laybach ain niderlag sein vnnd gehalten werden sol, das wir demnach zu bewarung vnnd besserer ordnung der kaufmanswar vnnd henndel vnnsern getrewen lieben burgermaister richter vnnd rath vnnser stat Laybach gnedigclich gegent vnnd erlaubt haben wissentlich mit dem brieff, also das sie in der stat Laybach ain niderlaghaus aufrichten darein alle kaufmanswaar vnd gutter so dahin komen gelegt behalten vnnd gewogen werden, dagegen sie ain zimblich vnbeschwarlich wag vnnd behaltgelt nach vnnser massigung vnnd gefallen nemen sollen vnnd mugen von menigclich vnuerhindert vnd vngeirrt, vnnd emphelhen darauf allen vnnd yegclichen kaufleutten so mit irrer kaufmanswaar vnd guttern vnser stat Laybach besuchen mit ernst gepiettend vnnd wellen das sie alle ir kaufmanswaar vnnd guetter so sie gen Laybach bringen werden alle zeit in das niderlaghaus ablegen da behalten vnnd was gekauft oder verkauft wirdet wegen lassen vnnd die sonnst niendert hin haimblich noch offentlich verordnen, sich auch des zimblichen wag vnnd behaltgelts wie obsteet nit widern noch hierin vngehorsamb erscheinen bey vermeydung vnnser schweren vngnad vnnd straf. Das mainen wir ernstlich. Mit vrkund dis briefs geben in vnnser stat Audenarde in Flanndern am vierdten tag des monntas augustt anno etc. im dreyzehenden vnnser reyche des romischen im achtvnndzwainzigisten vnnd des hungerischen im viervnndzwaintzigisten jaren.

GZLIV/57

Po privilegijski knjigi B. Otorepec